1. VOSTEDES PRESENTAN HOXE A
MESMA PROGRAMACIÓN QUE FAI 10 MESES.
2. IGNORA POR COMPLETO A
SITUACIÓN ECONÓMICA E SOCIAL NA QUE SE DEBE DESENVOLVER
3. NON TEN EN CONTA QUE ESTE
EQUIPO LEVA MAIS DE DOUS ANOS GOBERNANDO E QUEDALLE MENOS DUN ANO PARA POR EN
MARCHA AS MEDIDAS QUE PROPÓN PRESUNTAMENTE.
1. VOSTEDES PRESENTAN HOXE A
MESMA PROGRAMACIÓN QUE FAI 10 MESES.
O
contido da Programación Plurianual que se presenta non se diferencia en nada
sustancial do texto rexeitado polo Claustro en decembro de 2011. En
efecto, tan só está estruturado de distinta forma e fíxose un esforzo por mellorar
a redacción e engadir (nalgúns casos
aleatoriamente) os anos de execución dalgunhas accións, o que mellora a
presentación e a súa lectura pero non o contido.
O
documento segue a ser un "desideratum", un listado de desexos, cheo
de xeneralidades e declaracións de
intencións, de anuncios de estudo e análises de situación,
de posíbeis actuacións (moitas inconexas) pero que non define un modelo
universitario coherente.
Está moi lonxe da realidade,
pretendendo en menos de dous anos abordar revisións e cambios estruturais e
normativos de calado (que inclúen case todos os ámbitos da actividade
universitaria), cando a lóxica e a experiencia do seu goberno nos convencen de
que non é posible facelo en períodos tan curtos.
Isto por si só xa sería
suficiente para votar en contra como fixemos en decembro de 2011. Porque non
hai motivo ningún para cambiar o voto.
2. IGNORA POR COMPLETO A
SITUACIÓN ECONÓMICA E SOCIAL NA QUE SE DEBE DESENVOLVER
Isto xa o dixemos o ano
pasado. ¡Como non imos a dicilo agora se vostede nos trae o mesmo documento,
despois da que está caendo neste país nos últimos meses! Os cambios na política económica dos dous últimos
anos por mor da crise, os cambios normativos en políticas de persoal coa
limitación de contratacións e reposición
de vacantes que tanto nos afectan a nosa
actividades docente e
investigadora, non teñen nin o máis mínimo reflexo no documento, que ao manter
a mesma redacción que fai ano e medio ignora
por completo esa realidade e nada se di de como pensa enfrontala no resto do
seu mandato.
3. NON TEN EN CONTA QUE ESTE
EQUIPO LEVA MAIS DE DOUS ANOS GOBERNANDO E QUEDALLE MENOS DUN ANO PARA POR EN
MARCHA AS MEDIDAS QUE PROPÓN PRESUNTAMENTE.
Neste tempo leva tomando decisións erráticas, contraditorias,
en moitos casos, co que enuncian na Programación presentada. Para ilustrar o
que digo teño seleccionado uns exemplos en investigación, en titulacións e oferta docente e na política
de financiamento que trato de expoñer brevemente aínda que serían moitos mais
A) INVESTIGACIÓN E
TRANSFERENCIA DE RESULTADOS
Por non falar da súa falta de
compromiso cos investigadores IPP e RC que converteron no maior conflito do seu
mandato, quero recordarlle que esta universidade ten o único Campus de
Excelencia de ámbito Internacional de Galicia que é o Campus Vida. Sendo un dos
principais activos que ten esta universidade vostedes parece que se avergonzan
del, ralentizan todos os seus proxectos, na programación apenas aparece (Páx
28), non teñen ningún programa ambicioso, nin liñas de traballo especificas dos
ámbitos das humanidades e das ciencias sociais para asociar a este campus. Non
teño que lembrarlle que os Campus de Excelencia son un criterio esencial no
Plan de Financiamento do SUG.
Tamén son fundamentais no Plan
de Financiamento os criterios vinculados a actividade de investigación e
transferencia no que todos se miden en relación co número de PDI doutor. Por
iso é fundamental que a maior parte do
PDI teña un alto nivel de actividade de investigación e resultados
transferibles. Pero iso non se consigue con propostas tan tímidas como as
que vostedes traen na páxina 28 do documento. É utópico pensar que o
profesorado non activo en investigación vaia mellorar agora nun momento de
falta de recursos incluso para os grupos competitivos a non ser que se
implanten medidas rigorosas de avaliación e rendición de contas e que teñan
consecuencias reais.
Na súa programación teñen unha
páxina completa (páx. 48) dedicada á necesidade de reforzar as estruturas e procesos de transferencia de
resultados de investigación. Son áreas nas que a USC foi pioneira e un
referente para as outras universidades.
Na súa programación ignoran esta realidade e propoñen a realización de
medidas como se partiran de cero... e, o que é aínda máis grave, como vemos
estos días nos xornais, están desmantelando os servizos da área de
Valorización, Transferencia e Emprendemento, cunha estratexia demoledora dende
o inicio do seu mandato.
B) TITULACIÓNS E OFERTA
DOCENTE
Na páxina 23 falase do
"Desenvolvemento estratéxico do Campus de Lugo". Tema de enorme
importancia no goberno da nosa universidade. O Campus de Lugo ten unhas características especiais, vive un momento
delicado e necesita atención en todo os eidos. No que se refire a revisión
e actualización da súa oferta docente nunca nos dixeron cal era o seu plan. No
último ano animaron aos compañeiros de Lugo a traballar na preparación do
ofertas de grao (Ciencias experimentais, Enxeñaría e Ciencias dos Materiais)
coa falsa promesa de que se poderían sacar adiante... e vostedes mesmos se
encargaron de paralizar as súas propostas nas comisións e no Consello de Goberno.
¿Como se pode crer no que fan? ¿Cal é a súa meta para o campus de Lugo?
Seguramente non teñen ningunha.
Na oferta de másteres (Páx.
22) falan de implementar accións para incrementar as taxas de matrícula. ¿Cales? Neste momento a cuarta parte
dos másteres non acadan o mínimo
requirido polo decreto 222/2011 e dende o 7 de setembro hai alumnos recibindo clases nos másteres
nos que se matricularon e, mes e medio
despois , o dia 15 de outubro poden anularlle a matricula e mandalos para a
casa...porque o máster non reúne o mínimo de alumnos...¿A que esperan para
tomar unha decisión? ¿De que falan coa
Consellería? ¿Ou é que non lles fan caso?.
Na páxina 22 falan de
desenvolver a Escola de Doutoramento Internacional, pero o certo é que, despois
de dous anos e de ter nomeado xa dúas directoras, aínda non foron capaces de
rexistrar no RUCT á Escola de Doutoramento de Ciencias e Tecnoloxías da Saúde e
tampouco de definir con claridade o seu papel no regulamento dos estudos de
doutoramento aprobado recentemente no CG.
Non teño tempo de insistir,
pero non podo pasar por alto o despropósito da normativa de permanencia dos
estudantes que se leva redactando dende mediados de 2010, sen consenso, e que non deixa de provocar problemas no
momento da súa aplicación.
C) FINANCIAMENTO
Xa mencionamos antes o gol que
lles meteron cos criterios do Plan de Financiamento ao promedialos ao número de doutores...
A falta de recursos pode
colocarnos en situacións de necesidade que de forma excepcional requira botar man
temporalmente de remanentes para aliviar situacións de falta de tesourería.
Pero vostede fixo algo peor: requisou os
remanentes dos centros e departamentos (fondos de investigación
fundamentalmente) e repartiunos para outros gastos xerais segundo o seu propio
criterio, vulnerando as normas que nos
tiñamos dado para os gastos nestas unidades.
Remato lembrándolles que todas
as obras (Pax. 43) que din proxectar xa estaban en marcha ou negociadas en xuño
do 2010 (nave da EPS de Lugo, Enxeñaría Civil de Lugo, CITIUS, CEBEGA, Aula de
produtos lácteos)... pero renunciouse expresamente a acadar fondos para outras
obras novas... (CIFUS, Reforma de Químicas)... A obra RAM que se adxunta no
documento corresponde a 2011-2012 pero nin unha liña do 2013-2014... ¿Qué se
está sometendo a aprobación? ¿Que propón para os meses que faltan ? Nada...
CONCLUSIÓN
En definitiva, nunca nos dixo
claramente o que querían facer nos 4
anos de mandato e tampouco agora nos din
o que queren facer nos vindeiros meses que lle restan.
O documento está fora da
realidade. Tan fora da realidade que foi redactado por un equipo de goberno do
que 4 vicerreitores teñen dimitido ou foron cesados. Tan fora da realidade que pretende revisar
por completo a USC en menos de dous anos e iso todos sabemos que é imposible e
menos aínda por un equipo que vive afogado nos asuntos do día a día. Non se
trata de ter un papel que se chame "programación plurianual", tratase
de saber cara onde vai este equipo e esta universidade... vostedes non o
saben...
Por iso pedimos a retirada deste texto.
No hay comentarios:
Publicar un comentario