No documento entregado, e a pesares de dedicarlle
10 páxinas a describir o Plan de Financiamento –repetición literal de propostas
de Liñas Xerais anteriores- así como outras tres páxinas á situación financeira
da USC, non se referencia de forma clara e concisa o que supón de ingresos para
a USC a aplicación do actual Plan de Financiamento. Tan só na páxina 22 do
documento –última liña-, recollese “Financiamento estrutural e por resultados,
por 122,15 millóns de euros”.
Consideramos que esta falta de información é un
intento máis de desviar a atención sobre as verdadeiras causas da situación
económica actual da USC. É por elo que, a pesares de que pedimos a retirada
destas Liñas Xerais, vemonos na obriga de recoller nesta enmenda a información
sobre o resultado para a USC da aplicación do actual Plan de Financiamento do
SUG. Utilizamos para elo os propios datos achegados pola Vicerreitora de
Economía no Claustro de decembro de 2013.
O cadro resumo, ao que se engade tamén a comparativa coa realidade do
anterior Plan de Financiamento no ano 2010 é o seguinte
Queda claro das cifras recollidas no cadro anterior
que esta universidade resultou
extremadamente prexudicada polo actual Plan de Financiamento que o equipo
de goberno da USC negociou e asinou.
As cantidades globais do mesmo, que sí aparecen no
documento de Liñas Xerais –páxina 9- son claramente insuficientes para o SUG,
pero o grave é que esta universidade perde
peso relativo e cada vez recibe menos recursos en beneficio das outras dúas
universidades galegas, que si poideron presentar e aprobar os orzamentos en
tempo e forma, sen os problemas cos que se atopa agora a USC.
Os recursos achegados á USC polo actual Plan de
financiamento diminúen moi considerablemente respecto de anos anteriores.
No ano 2013 se teñen ingresado 9.140.000 Euros
menos da Comunidade Autónoma no marco do Plan de financiamento que no ano 2011.
Para o ano 2014 orzamentanse os mesmos ingresos por subvención fixa e por
resultados que os acadados no ano 2013, a pesares de incrementarse o total de recursos
do Plan en 3 millóns de euros –páxina 9-, incremento que, polo que se ve,
levanse en exclusiva as outras dúas universidades.
A situación aínda é mais grave se comparamos os ingresos actuais cos do último ano do Plan
anterior, o ano 2010. A USC ten recibido no ano 2013 un total de 15,8 millóns
de euros menos que no ano 2010, situación que se mantén tamén no ano 2014
segundo as provisións do equipo de Goberno. Somente con manter a situación do
ano 2010, a USC nestes catro anos tería ingresado 51,6 millóns de euros mais.
E de manter a situación do primeiro ano do actual
Plan de Financiamento, ano 2011, a USC tería ingresado a maiores nestes tres
anos a cantidade de 26,4 millóns de euros.
Todo o anterior reflicte, como xa temos exposto en
anteriores claustros, a incapacidade desde equipo, primeiro para lograr un Plan
de Financiamento con recursos suficentes para o SUG en xeral e para a USC en
particular, e segundo, a incapacidade para manter, cando menos, o peso relativo
da USC dentro do SUG.
A perda de peso relativo está directamente
relacionada cos criterios de reparto dos fondos ligados a resultados, que
incrementaron o seu montante global nos anos 2013 e 2014 en detrimento do
financiamento estrutural. Estes fondos repartense segundo uns criterios moi perxudiciais para a USC,
como se explicou claramente na enmenda presentada por +IDEAS e aprobada por
este Claustro en decembro de 2010. En dita enmenda explicabase que os criterios
que naquel entón estaban en discusión non contemplaban o peso relativo das
universidades, recibindo o mesmo as universidades cos mesmos resultados con
independencia do seu tamaño. A este Claustro gustaríalle saber qué defensa se
fixo do mandato deste Claustro coa enmenda aprobada, pois nas actas do Consello
Galego de Universidades do ano 2011 no que se aproban estes criterios non
consta referencia algunha desta Universidade ao respecto.
O resumo de todo o anterior é unha importante perda de peso relativo da USC
no reparto duns fondos xa de por si claramente insuficientes.
So de ter sido quén de manter as achegas, xa non do
anterior Plan de Financiamento, senón do resultado da aplicación no primeiro
ano do Actual Plan, a situación da USC e os orzamentos que agora estaríamos a
analizar seria radicalmente distinta. É por todo elo que este Equipo de Goberno
non pode seguirse escudando na herdanza recibida para xustificar a súa
incapacidade, facendo referencia reiterada a situación de endebedamento. Queda
claro que os compromisos de débeda da USC poderían ser cubertos con creces –incluso
con amortizacións anticipadas como se pode ver analizando as cifras do cadro-
se se mantivese o peso relativo da USC no reparto dos recursos do SUG, xa non
digamos se ademais se tivese logrado manter a situación do ano 2010.
O peor de todo é que esta renuncia por parte do
Equipo de Goberno a reivindicar e acadar os recursos que lle corresponden a USC
polas súas necesidades e posición no SUG, consolida unha situación de
financiamento entre as tres universidades galegas á que vai ser moi difícil dar
a volta no futuro próximo, hipotecando con elo o futuro da nosa universidade.
Esta realidade resulta aínda máis grave se temos en
conta que neste período de goberno a USC ten renunciado a por en marcha
proxecto novo algún que permita seguir avanzando, ou cando menos mantendo a
posición que mantiñamos dentro do SUG e dentro do sistema universitario
español
Feita esta primeira valoración global das Liñas
Xerais, da que se pode concluír claramente cal é a realidade económica e
orzamentaria da USC para este ano 2014, se entramos na análise dos ingresos e
gastos, sen necesidade de afondar demasiado observase claramente que as cifras
“están cadradas a machada” para poder igualar ingresos e gastos, sen que exista realmente un proxecto
orzamentario ligado a obxectivos, fundamentado e viable. Sirvan como
exemplos o feito de recoller como ingresos 2,78 millóns de euros por litixios
pendentes dentro do capítulo III, cando este recoñecemento debe facerse con
sentenza firme –qué pasa se a sentenza se demora máis aló do 2014, ou o que
sería peor se a sentenza é contraria á USC, como se cadraría entón o
orzamento?-, ou o feito de solicitar aprazar un ano a devolución de anticipos
reembolsables por importe de 3,4 millóns de euros –dise que se ten solicitado,
esta xa concedido o aprazamento?, cómo se afrontaría no ano 2015 a devolución
desta cantidade do 2014 máis a do 2015, cando parece que nada vai mudar no
actual Plan de Financiamento para a USC?-
En resumo, estas Liñas Xerais non son máis que o
reflexo no papel, aínda que agochando información para que non quede tan
explícito, da xestión deste equipo de goberno nestes tres anos e medio. Xestión
que vai máis aló do económico, e que se pode resumir de renuncia a loitar por
manter o proxecto da USC como unha universidade con futuro.
No hay comentarios:
Publicar un comentario