Elaborada por membros do Consello de Goberno pertencentes ao Colectivo +IDEAS
A información recollida nesta reseña non ten validez oficial
PUNTO ÚNICO: Convocatoria da Comisión de Desenvolvemento
Estatutario
Na súa intervención inicial o Sr. Reitor fai
unha introdución na que esencialmente di o seguinte:
No claustro do 25/4/12 non se puido aprobar o proxecto de novos estatutos por tan só
dous votos para atinxir o quórum necesario. A mesa do claustro reuniuse no mes
de maio, e decidiu coñecer a dispoñibilidade da Comisión de Desenvolvemento
Estatutario para continuar co traballo e presentar unha nova proposta. A
devandita comisión, na súa xuntanza do 21/5/12, remitiu, por unanimidade, un
escrito no que se indicaba a necesidade de facerlle un novo encargo, tal e como
se sinala nos actuais estatutos.
Para o equipo reitoral existen dúas opcións:
(i) incorporar aquelas emendas do claustro con maior apoio e presentar de novo
os estatutos ou (ii) facer unha modificación con maior profundidade.
Intervén J.Viaño e..
Aínda que pode parecer que o sentir
maioritario dos claustrais e seguramente da comunidade universitaria poda dar a
entender que a non aprobación do Proxecto de Estatutos por falta de 2 votos é
un accidente co que todos nos sentimos amolados, non debemos caer na tentación
repetir a votación do mesmo texto porque sería sentar un precedente perigoso e
nada democrático de anular unha votación polo puro sentimento de que o
resultado que se quería era outro. Pero ese sentimento non se pode medir, non
sabemos por que non foron a votar moitos claustrais (¿pensaron que non era
necesario? ou ¿non lle gustaron algunhas emendas aprobadas?). Unha repetición
sen máis dunha votación na que non houbo ningunha irregularidade non podemos
permitila para evitar reproducir unha situación de descrédito institucional (¿como
nos vería a sociedade se a votación se perde outra vez?).
Por iso, estamos de acordo coa resposta da
Comisión de Desenvolvemento Estatutario de iniciar unha nova reforma. Pero o artigo
186 dos estatutos e o Art. 37 do Regulamento Interno do Claustro, estipulan que
ben o Consello de Goberno ou ben un 20% dos claustrais son os que teñen a
capacidade para encomendar a reforma. Esta reforma debe ser tramitada polo
Reitor á Mesa do Claustro para que, unha vez asumida, sexa o claustro quen
decida, segundo o Art. 186 dos vixentes Estatutos e o Art. 37 do Regulamento do
Claustro.
Sen embargo, na súa intervención e nas posteriores aclaracións do
Sr. Reitor e da Secretaria Xeral ás intervencións de J Viaño, L Fernández e A
Pérez, a proposta do equipo reitoral é a
seguinte:
Solicitar da Mesa do Claustro que encargue á
Comisión de Desenvolvemento Estatutario que, o máis axiña posible, presente
unha nova proposta de Estatutos. Tendo en conta o amplo respaldo que o borrador
xa tivo no claustro, esa nova proposta debería conter as mínimas modificacións.
Dado que xa esta constituída unha Comisión de Desenvolvemento Estatutario,
delegada do Claustro, non é necesario unha convocatoria previa do Claustro para
seguir adiante coa reforma, toda vez que estamos obrigados por lei a facer uns
estatutos e a reforma xa está definida.
Votación da proposta: Votos a favor: 32 -
Votos en contra: 0 - Abstencións: 3
ANEXO
Esta convocatoria obedecía á resposta
enviada pola Comisión de Desenvolvemento Estatutario á consulta formulada polo
Reitor unha vez reunida a Mesa do Claustro.
ESCRITO DO SR. REITOR AO PRESIDENTE DA
COMISIÓN DE DESENVOLVEMENTO ESTATUTARIO
Benquerido Presidente:
A mesa do Claustro reuniuse o pasado luns 21 de maio para analizar os
resultados do último Claustro, e buscar solucións á situación creada pola falta
de aprobación do proxecto de estatutos presentado.
Entre as actuacións adoptadas decidiuse solicitar á Comisión de
desenvolvemento estatutario que preside a posibilidade de presentar un novo
proxecto ao Claustro, ben antes do mes de agosto, ou despois da metade de
setembro. Dado o sentimento positivo demostrado con carácter moi maioritario,
trátase en todo caso de non perder ese clima favorable.
Santiago de Compostela, a 28 de maio de 2012
RESPOSTA DA COMISIÓN DE DESENVOLVEMENTO
ESTATUTARIO
“Considerando que
a función específica desta Comisión de desenvolvemento estatutario é a
elaboración dos proxectos de reforma dos Estatutos da Universidade que lle
encargue a Mesa do Claustro Universitario, ata conseguir a aprobación dos
mesmos, a Comisión estima por unanimidade que se lle debe realizar un novo
encargo, nos termos previstos polos vixentes Estatutos da Universidade, para
reabrir o proceso de reforma estatutaria.”
EXPLICACIÓN COA
CONVOCATORIA DO CONSELLO DE GOBERNO:
Co fin
de que a Comisión de Desenvolvemento Estatutario poida reiniciar a tarefa de
preparación dun borrador de Estatutos para a súa presentación de novo ao
Claustro, e do mesmo xeito que se fixo no mes de decembro de 2010, procede
convocar sesión extraordinaria do Consello de Goberno para decidir, na maior
brevidade posible, sobre o devandito asunto.
Os vixentes Estatutos da USC e o Regulamento Interno do
Claustro para a reforma estatutaria teñen previsto o seguinte:
ESTATUTOS
Da reforma dos estatutos
Artigo 186º
1. A iniciativa para a reforma dos presentes estatutos correspóndelle ao
Consello de Goberno ou ao vinte por cento dos membros do Claustro.
2. Consonte o procedemento establecido para este fin no regulamento de
funcionamento do Claustro Universitario, a reforma dos estatutos requirirá a
aprobación por maioría absoluta do Claustro.
3. O novo texto será remitido á Xunta de Galicia para a súa ratificación e
terá vixencia a partir do día seguinte á data da súa publicación no Diario
Oficial de Galicia.
REGULAMENTO INTERNO DO CLAUSTRO
Capitulo VI - Da Reforma dos
Estatutos
Artigo 37
1.
De conformidade co artigo
186 dos Estatutos da Universidade, o Claustro Universitario poderá aprobar a
reforma dos Estatutos por maioría absoluta, a iniciativa do Consello de Goberno
ou do vinte por cento dos membros do Claustro.
2.
A solicitude de reforma
será presentada ao reitor mediante certificación do acordo do Consello de
Goberno expedida polo secretario xeral ou mediante escrito asinado polos
membros do Claustro, e entregado no Rexistro Xeral da Universidade. A
iniciativa deberá conter unha proposta concreta de reforma ou detallar os
aspectos dos Estatutos que se propón modificar. Unha vez recibida a solicitude,
o reitor daralle traslado á Mesa do Claustro, que decidirá a súa admisión se
cumpre os requisitos e, no seu caso, convocará unha sesión do Claustro na que
será debatida.
3.
A Mesa do Claustro
decidirá sobre o procedemento de discusión da proposta de reforma. En todo
caso, establecerá un procedemento de redacción dun proxecto de reforma que será
posto en coñecemento dos membros do Claustro coa apertura dun prazo mínimo de
dez días hábiles para facer emendas, nas condicións que estableza a Mesa
segundo o presente Regulamento. Na caso de que estivese constituída unha
Comisión de Estatutos ou desenvolvemento estatutario, a Mesa encomendaralle a
redacción do proxecto de reforma.
No hay comentarios:
Publicar un comentario